Катарскиот шеик Јасим бин Хамад ал Тани објави дека се повлекува од процесот за купување на акциите на Манчестер Јунајтед.
Шеикот Јасим, кој е син на поранешниот премиер на земјата, речиси една година се обидува да ги стекне акциите на 20-кратниот шампион на Англија, кои се во сопственост на американското семејство Глејзер.
Според медиумите на островот, шеикот Јасим бил подготвен да плати 3,5 милијарди долари за 100 отсто од акциите на клубот, а дополнително би ги презел сите постоечки долгови и немал намера да зема нови заеми во име на „црвените ѓаволи“, бидејќи тоа го прават сега сопствениците на клубот.
Сепак, овој предлог не го задоволи семејството Глејзер, кое беше информирано за одлуката на катарскиот шеик да се повлече од договорот.
Во сегашната ситуација, доколку се продадат акциите на клубот, негов нов сопственик најверојатно ќе биде основачот на хемиската компанија Инеос, Сер Џим Редклиф, кој е најбогатиот Британец.
