Вардар е на дното, а Шкендија на врвот на табелата. За некои други времиња, секако, чудна ситуација на поранешните ривали за титулата. Денеска ќе имаат меѓусебна пресметка на стадионот „Борис Трајковски“ во Маџари, но со различни амбиции.
Вардар гледа да се спаси од најлошо, а Шкендија да го задржи врвот.
„Натпреварот меѓу Вардар и Шкендија да се играше во некои понормални времиња и понормални услови ќе беше меч кој ќе одлучуваше кој ќе биде есенски шампион. За жал, реалноста е друга, ние сме во зоната за испаѓање и се бориме да излеземе од неа. Противникот има свои математики, се бори за прво место, па мислам дека ќе биде еден интересен натпревар. Според мене, нема да победи поквалитетниот, туку тој што ќе има повеќе желба и што ќе покаже повеќе карактер на теренот“, изјави Дарко Мицевски, капитенот на Вардар.
Актуелниот шампион Струга ТЛ на домашен терен го пречекува Силекс во вториот дуел од денешната неделна програма.
ПРВА ЛИГА, 10.КОЛО
ВАРДАР – ШКЕНДИЈА (денеска, 14 часот)
СТРУГА ТРИМ ЛУМ – СИЛЕКС
БРЕРА – ГОСТИВАР 0-1
БРЕГАЛНИЦА – РАБОТНИЧКИ 2-1
ТИКВЕШ – ШКУПИ 1-1
ВОСКА – МАКЕДОНИЈА ЃП 2-1
