МАКФУДБАЛ во Малта,
Никола Ѓуровски
Фудбалската репрезентација на Македонија е пред нов предизвик во квалификациите за ЕВРО 2024. После ремито со Италија, сега секако е императив да се оствари триумф во Ла Валета, против селекцијата на Малта. Иако се работи за последнопласираната селекција во групата, сепак, селекторот Благоја Милевски потенцира дека ривалот воопшто не е наивен, и далеку од тоа дека нема квалитет.
„Малта не е наивен ривал и затоа сме максимално фокусирани. Видовме и на првиот меч во Скопје дека се работи за селекција која напредува и има свој квалитет и не смееме да мислиме дека лесно ќе стигнеме до победа. Фудбалерите се свесни за тоа, ова е можеби најважниот меч за нас во овие квалификации, знаеме што ни носи триумфот и трите освоени бода. Добра атмосфера и надежи за нешто многу повеќе во овој квалификациски циклус. Имаме повторно одредени проблеми со составување на тимот, но сигурен сум дека сите кои ќе добијат шанса ќе дадат максимум од себе да ја оправдаат и дадат свој придонес во постигнувањето на целта“, изјави селекторот Благоја Милевски.
Натпреварот меѓу Малта и Македонија се игра вечерва со почеток во 20.45 часот, на Националниот стадион во Ла Валета.
