Комплетирано е првото коло од јужноамериканските квалификации за Светското првенство во фудбал во 2026 година.
Јужноамериканците не го менуваат системот, десет селекции ќе одиграат дури 18 кола во овие квалификации, но сега разликата е во тоа што поради проширувањето на Мундијалот во финалето ќе се пласираат и најдобрите шест селекции на табелата, додека седмопласираниот ќе игра меѓународен плеј-оф.
Бразил имаше доминантен старт на новата кампања на домашен терен, откако Боливија беше поразена со 5-1.
Нејмар конечно се појави на теренот и промаши пенал во 17. минута. Напаѓачот на Реал, Родриго, го отвори резултатот во 24. минута, а играчот на Барселона Рафиња во 47. минута го удвои водството.
Родриго повторно беше стрелец во 53. минута, а потоа на сцена стапи Нејмар кој во 61. и во 93. минута ја погоди мрежата на Боливија. Гостите постигнаа почесен гол преку Абрего во 78. минута.
Со овие два гола Нејмар стана најдобриот стрелец на бразилската селекција во историјата, стигна до бројката од 79 на „вечната листа“ на голови за репрезентацијата, со што го престигна легендарниот Пеле кој има гол помалку.
Уругвај го победи Чиле со 3-1 на легендарниот „Сентенарио“ во Монтевидео.
Двоен стрелец беше фудбалерот на Ривер Плата, Николас де ла Круз во 38. и 71. минута, а Феде Валверде погоди во 45. минута. Голот за Чиле го постигна искусниот Артуро Видал во 74. минута.
Претходно, Аргентина го победи Еквадор со 1-0, Колумбија со истиот резултат ја победи Венецуела, додека Парагвај и Перу ремизираа без голови.
