Македонскиот првак Струга Трим Лум има згуснат распоред блгодарејќи на одлилните настапи на европска сцена. В четврток ги очекува првиот дуел против Брејдаблик во плеј-оф колото во Конференциската лига за пласман во групната фаза, но тимот на Шпетим Дуро денеска (17 часот) на стадионот во Струга ќе биде домаќин на Брера во македонскиот шампионат.
Овие натпревари секогаш се „најопасни“, така барем сметаат тренерите, затоа што фудбалерите со мислите веќе се насочени кон европските предизвици. Но, Шпетим Дуро ќе се обиде да ги мотивира да одиграат квалитетно и против Брера, која има максимален старт по две кола во Првата фудбалска лига.
Струмичани го почитуваат успехот на Струга ТЛ во Европа, но и веруваат дека можат да забележат позитивен резултат на денешниот меч.
„Респект за Струга ТЛ и за одличните резултати што ги направи на европска сцена. Тоа е добро за целиот македонски фудбал. Но, во пресрет на денешниот натпревар, ние сме максимално мотивирани да продолжиме со добри игри и резултати. Веруваме во нашите квалитети и се надеваме на успех“, изјави Георгије Јанкулов.
Мечот е закажан за 17 часот на Градскиот стадион во Струга. Останатите натпревари се одиграа вчера.
ПРВА ЛИГА, 3. КОЛО – РЕЗУЛТАТИ
ТИКВЕШ – ШКЕНДИЈА 1-2
ВОСКА – ВАРДАР 3-2
БРЕГАЛНИЦА – ГОСТИВАР 2-1
РАБОТНИЧКИ – МАКЕДОНИЈА ЃП 1-0
ШКУПИ – СИЛЕКС 1-1
ДЕНЕСКА: СТРУГА ТЛ – АП БРЕРА (17 часот)
