Тренерот на Реал Мадрид, Карло Анчелоти, почнува да го губи трпението со раководството на клубот. Италијанецот продолжува да инсистира на доведување на врвен напаѓач кој ќе го заземе местото на Карим Бензема, но се чини дека таков нема да пристигне летово, пишува „Мундо Депортиво“.
Анчелоти се надеваше дека Реал Мадрид ќе успее да го ангажира Хари Кејн во овој преоден рок. Сепак, „кралевите“ не сакаат да платат над 100 милиони евра за уште еден нов играч откако претходно го доведоа Џуд Белингем.
Единствениот за кого Реал Мадрид би платил големи пари е Килијан Мбапе, но во оваа фаза и неговото доаѓање е „паузирано“.
Во моментов раководните фактори на „Сантијаго Бернабеу“ сметаат дека тренерот мора да се задоволи со играчите кои ги има на располагање. Реал Мадрид досега се засили со ангажирање на ветеранот Хоселу од Еспањол на позајмица.
