Голманот на ПСЖ, Серхио Рико, е сѐ подобар откако се разбудил од кома, потврди неговата сопруга за шпанскиот медиум „Телечинко“.
Серхио Рико беше во кома три недели по несреќата на јавање во шпанската провинција Андалузија. Потоа во тешка состојба беше префрлен во болница, а лекарите едвај успеале да му го спасат животот.
„Го гледаме светлото на крајот од тунелот. Одиме чекор по чекор. Од самиот почеток знаев дека ќе се извлече бидејќи е шампион“, изјави за шпанските медиуми сопругата на Рико, Алба Силва.
Според нејзиното сведочење, голманот на ПСЖ бил свесен кога пред него се појавиле членови од неговото семејство и со неколку гестови ги поздравил.
„Серхио сега комуницира. Не нарекува по име, одлично знае кои сме, му се врати сеќавањето“, додаде сопругата на фудбалерот.
Коњот на Рико се судрил со друг, побегнат коњ. Голманот и неговиот коњ паднале на земја, а Рико бил удрен со копито во главата од едно од животните.
Серхио Рико при падот ги скршил прешлените на вратот и доживеал мозочен удар. Итната помош брзо пристигнала и со хеликоптер го префрлиле повредениот голман во болница во Севилја каде ги минува последните три недели.
