Македонскиот селектор Игор Ангеловски искажа задоволство од играта на националниот тим во ремито (1-1) на гостувањето против Израел, но потенцираше дека може да жалиме за пропуштениот триумф по огромната шанса на Елиф Елмас во финишот од средбата…
„Задоволни сме можеби со бод, но можеме да жалиме за сите три по големата шанса во финишот. Адеми покажа големо срце, одигра одлично и покрај повредата, мислам дека и сите останати беа одлични и извонредно борбени. На стартот сакавме да го неутрализираме противникот и да добиеме играч повеќе во средниот ред па токму поради тоа беше тој избор на фудбалери. Во секој случај оваа игра во Израел треба да ни даде дополнителен мотив сега безусловно да одиме на победа во Летонија“ – истакна Ангеловски на прес-конференцијата по натпреварот со Израелците.
Селекторот на Израел, Енди Херцог смета дека неговата репрезентација била подобар противник на теренот во квалификацискиот натпревар против Македонија, но на крај може и да бидат среќни со промашената шанса на Елиф Елмас и освоениот бод од пресметката во Бер Шева…
„Бевме подобар противник, но мора да кажам дека воопшто не беше лесен натпревар. Постигнавме водечки погодок, но Македонија брзо израмни. Мора да бидеме искрени, на крајот имаа одлична шанса за победа и тоа ќе беше трагедија за нас. На крајот, ремито е можеби и добро но ќе треба да украдеме некој бод повеќе од гостувањата ако сакаме да останеме во игра за пласман на Европско првенство“ – истакна Херцог.
