Капитенот на фудбалската репрезентација на Македонија, Горан Пандев, е избран за најдобар спортист за 2020 година во изборот на Сојузот на спортови и Агенцијата за млади и спорт. Предводникот на фудбалскиот национален тим го постогна победничкиот гол против Грузија во плејофот за историски пласман на Македонија на Европското првенство.
„Имам чест и задоволство да му се поклонам нему, а преку него и на сите спортисти“, изјави премиерот Зоран Заев за наградата која му припадна на Горан Пандев.
„Жал ми е што не сум присутен директно на манифестацијата. Благодарност за оваа награда, која сакам да поделам со сите соиграчи, селекторот, но и докторите, економите и сите кои се дел од фудбалската репрезентација. Ова ми дава мотив и понатаму да го носам дресот на мојата репрезентација, што за мене е светост“, изјави Горан Пандев преку видео линк.
Македонската фудбалска репрезентација е и најдобар национален тим за 2020 година, а Игор Ангеловски е најуспешен селектор. Фудбалската федерација на Македонија е најуспешна федерација во годината што е зад нас.
Најдобар спортист за 2020: Горан Пандев (фудбал)
Најдобра спортистка за 2020: Вероника Костова (карате)
Најуспешен селектор: Игор Ангеловски (фудбал)
Најуспешен национален тим: Фудбалска репрезентација на Македонија
Најуспешна федерација: Фудбалска федерација на Македонија
Најдобра млада спортистка: Магдалена Божиновска (карате)
Најдобар млад спортист: Роберто Ацковски (карате)
Најуспешен спортист од лица со инвалидитет: Владимир Тркаљанов (шах)
