Менаџерот на Ливерпул, Јирген Клоп, изрази задоволство од триумфот (2-0) над Глазгов Ренџерс во групата А од Лигата на шампионите. Тој истакна дека на неговиот тим му беше потребен токму таков настап за да си ја врати самодовербата.
„Токму тоа ни беше потребно. Понекогаш треба да се менуваат работите. Сигурно беше изненадување за Глазгов Ренџерс како бевме поставени на теренот. Победивме со 2-0 и јас сум повеќе од среќен“, изјави Јирген Клоп.
Германецот се определи за многу повнимателна игра, посебно во одбраната, затоа што се покажа дека тимот прими многу голови на стартот на оваа сезона.
„Ја трениравме оваа формација само еднаш. Им кажав на играчите како сакам да играме и мислам дека тие се покажаа добро. Понекогаш немавме среќа со офанзивните акции, но во дефанзива бевме непробојни“, дополни Клоп.
