Шаќири и Бејтулаи: Одиме на победа против Арарат

Mакедонскиот првак Шкендија утревечер (20 часот) на Националната Арена „Тодор Проески“ во Скопје ќе го пречека ерменскиот Аратат и ќе го почне патот во Конференциската лига на УЕФА. Шефот Артим Шаќири и капитенот Егзон Бејтулаи се надеваат дека ќе биде долг и успешен, како некогаш, пред неколку години, за тетовскиот тим.

„Мислам дека сме добро подготвени. Го анализиравме противникот и можеби на хартија сме фаворити, но тоа треба да го покажеме на теренот. Секако не го потценуваме ривалот, но и нема да го прецениме Арарат“, изјави Артим Шаќири.

Капитенот на Шкендија, Егзон Бејтулаи, истакна дека тој и соиграчите сакаат да повторат едно успешно лето од пред неколку сезони.

„Имавме две неуспешни години во Европа, но тоа е сега зад нас. Подготвени сме пак да донесеме звучни тимови во Скопје, како што беше во минатото. Атмосферата во екипата е одлична и одиме на победа“, истакна Бејтулаи.