Шкупи го напаѓа Линколн и сака следна рунда во ЛШ

Македонскиот шампион Шкупи вечерва (20.45 часот) го почнува настапот во квалификациите на Лигата на шампионите. Линколн од Гибралтар е првата пречка за тимот на Гоце Седлоски и верува дека неговите избраниви се подобри и ќе успее да се пласираат во следното коло, каде ги очекува Динамо Загреб.

Шкупи вечерва, на првиот дуел е домаќин, на арената „Тодор Проески“ во Скопје.

„Подготвени сме, максимално. Еден месец работиме и подготвени сме за предизвикот. Нема да го потцениме противникот, апсолутно имаме респект за Линколн Ред Импс затоа што тоа е шампион на една земја, но веруваме во нашиот квалитет. Ние, секако, ќе ја играме нашата игра и сакаме да оствариме победа. Шкупи на секој натпревар игра напаѓачки, тоа секако ќе се случи и утревечер. Треба да покажеме зошто сме шампиони на Македонија“, вели Гоце Седлоски.

Капитенот Кристијан Наумовски е уверен дека Линколн е ривал што Шкупи треба да го елиминира.

„На хартија, го добивме најлесниот ривал. Но, знаеме дека нема да биде лесно. Најважен е првиот нареден натпревар. Засега размислуваме само за Линколн и како да оствариме триумф. Потоа ќе размислуваме за евентуалниот двомеч со Динамо Загреб“, изјави голманот Наумовски.