Англискиот стручњак и менаџер на Астон Вила, Стивен Џерард, изјави дека сака неговиот тим да победува на секој натпревар, а така ќе биде и на вечерашниот дуел против Ливерпул.
Астон Вила ќе го пречека Ливерпул во 33. коло на англиската Премиер – лига.
„Мојата работа е да направам се за Астон Вила да победи. Сакаме да ја завршиме сезоната што е можно подобро“, изјави Џерард за „Би-Би-Си“.
Џерард го презеде тимот на Астон Вила минатиот ноември, кога тимот беше на само два бода од зоната за испаѓање. По 10 победи во 23 првенствени натпревари, Вила моментално се наоѓа на 11. позиција на табелата.
„Ливерпул е тим од светска класа. Веројатно најдобриот тим во светот во моментов. Свесни сме за големината на предизвикот, но ќе биде возбудливо и со нетрпение го очекувам. Сакам да победам и ќе се бориме напорно “, изјави Џерард, поранешен капитен на Ливерпул.
Ливерпул моментално е на второто место на табелата, со три бода помалку од Манчестер Сити.
„И Ливерпул и Сити знаат дека ќе мора да работат напорно за да освојат бодови против Астон Вила“, додаде Џерард.
