Аргентинската мегаѕвезда Лионел Меси ќе биде на големо искушение во Пари Сен Жермен. Од него сите очекуваат веднаш да биде лидер во тимот и да прикажува магија каква што ги навикна во дресот на Барселона изминатите две децении. Но, дојдоа и критиките.
Тиражниот француски весник „Ле Паризиен“ го критикуваше напаѓачот на ПСЖ, Лео Меси, по реакцијата на натпреварот од последното коло во Лига 1 против Лион.
Најдобриот фудбалер на планетата беше заменет во 76. минута, а при напуштање на теренот, не сакаше да се поздрави со тренерот Маурисио Покетино.
Сите светски медиуми пишуваа за испадот на Меси во неделата, но „Ле Паризиен“ отиде чекор подалеку.
„Неговиот престој во Париз ќе биде повеќе предизвикувачки отколку што се очекуваше. Меси е блед. Ја спушта главата надолу и пониско, шета по теренот и повеќе не влијае силно на играта“, пишува „Ле Паризиен“ за ѕвездата која летово дојде во ПСGЖ како слободен играч од Барселона.
Аргентинецот за првпат играше пред публиката на „Паркот на принцовите“ минатиот викенд, а во првото полувреме ја погоди гредата од слободен удар. Тој нема постигнато ниту еден гол оваа сезона.
Во моментот кога 34-годишниот фудбалер ја напушти играта, резултатот беше 1-1, а Меси исто така беше критикуван дека реагира рамнодушно по победничкиот гол на Мауро Икарди во судиското продолжение.
