Барселона го одигра првиот натпревар по заминувањето на Лионел Меси. Реал Сосиедад пристигна на „Камп Ноу“ во првото коло од Ла Лига, а каталонскиот тим славеше со 4-2.
Навивачите на Барселона се договорија во пресрет на натпреварот дека во десеттата минута ќе скандираат и ќе аплаудираат за да му оддадат почит на Лионел Меси, најдобриот фудбалер во светот, кој летово ја напушти Барселона по 21 година и кој го носеше дресот со број „10“ за каталонски клуб во поголемиот дел од неговата кариера.
„Меси, Меси“ извикуваа фановите од трибините на „Камп Ноу“ мавтајќи со неговите дресови и ги покажуваа пораките што ги напишаа за Аргентинецот кој кариерата ја продолжи во ПСЖ.
Меси сакаше да остане во Барселона, но каталонците немаа доволно пари да го задржат иако се согласи на многу помала плата отколку што имаше порано.
