Фудбалската репрезентација на Чешка е третиот четвртфиналист на Европското првенство откако во Будимпешта пред 67.000 гледачи ја елиминура селекцијата на Холандија со триумф од 2-0. Ривалот на Македонија во групната фаза првпат го напушти Амстердам на шампионатот и доживеа елиминација. Селекцијата на Франк де Бур не одговори на предизвикот.
Холандија беше подобра во првото полувреме, но не успеа да го отвори резултатот. Неволјите за „лалињата“ почнаа во 55.минута, кога Матијс де Лихт заработи црвен картон играјќи со рака во дуелот со Патрик Шик, кога напаѓачот на Чешка ќе излезеше сам пред голот. Судијата Сергеј Карашев прво му покажа жолт картон, но по прегледувањето на ВАР снимката сепак се премисли и го испрати во соблекувалната.
Претходно, Дониел Мален имаше фантастична шанса за ја доведе Холандија во предност, излезе сам пред голманот Томаш Вацлик, но тој фантастично реагираше и спаси погодок.
Чешка поведе со голот на Томаш Холеш во 68.минута. По нафрлувањето од десната страна Томаш Халаш високо скокна на вториот дирек, ја врати топката, а Холеш со глава погоди на вистинското место.
Холеш беше асистент на вториот гол за Чешка што го постигна Патрик Шик во 80.минута. Тоа е негов четврти гол на шампионатот, а Чесите патуваат во четвртфиналето каде ќе ги одмерат силите со Данска.
