Капитенот Горан Пандев испрати емотивна порака до селекторот Игор Ангеловски, заблагодарувајќи му одличната соработка, но и за тоа што е главен „виновник“ што фудбалерите во националниот тим се сакаат сега како браќа и гинат еден за друг.
„Прв пат кога се сретнавме во вашите очи видов енергија, сигурност и голема желба да ја вратиш репрезентацијата во живот. Ги памeтам твоите зборови кога ми рече дека ќе направите од репрезентацијата една голема фамилија и дека вашата цел е Македонија да се пласира на Eвропско првенство. Сите овие години не беше лесно, имаше и многу препреки, но ти гордо ја чуваше нашата фамилија.
Шефе, благодарам е малку да ти кажам, Вие го сплотивте цел македонски народ, направивте да се сакаме како браќа во репрезентација и да гинеме еден за друг. Затоа, сакам да ти кажам дека вечно ќе останеш во моето срце“, напиша Горан Пандев во пораката до селекторот Игор Ангеловски.
