Барселона не можеше да направи чудо против ПСЖ во Париз и доживеа елиминација во осминафиналето од Лигата на шампионите. По поразот од 1-4 на „Камп Ноу“, Барса одигра одлично прво полувреме, но против себе го имаше расположениот голман Кејлор Навас.
Тренерот Роналд Куман вели дека најбитната разлика е во ефикасноста, ПСЖ постигна четири гола во Барселона, а неговиот тим само еден во Париз.
„Во фудбалот се бројат само головите и поради тоа ние доживеавме елиминација. Се збогуваме од ЛШ, но, сепак, сега оставивме добар впечаток за разлика од првиот меч. Бевме супериорни во цел меч, посебно во првото полувреме. Заслуживме многу повеќе во првиот дел, а најмалку водство од 1-2. Јасно е, тие беа ефикасни во Барселона, а ние тука не. Тие постигнаа четири гола на наш терен, а ние само еден, тоа е огромната разлика“, изјави Роналд Куман.
