Португалскиот стратег Серџо Консеисао од следната сезона би можел кариерата да ја продолжи во Италија. Тој направи феноменален успех со Порто елиминирајќи го Јувентус во осминафиналето на Лигата на шампионите и веднаш доби понуда за работа во Серија А.
Серџо Консеисао е еден од двајцата најсериозни кандидати за наследник на Чезаре Прандели на клупата на Фиорентина. Новиот претседател на „виолетовите“, Роко Комисо, сака да пронајде долгорочно решение за клупата на Фиорентина, а Консеисао има познавање на состојбите во Италија од периодот кога беше фудбалер на Лацио, Парма и на Интер.
Медиумите на Апенините најавуваат дека вториот кандидат за клупата на Фиорентина е Џенаро Гатузо, кој во моментот е тренер на Наполи, но би можел да си замине на крајот од сезоната.
