Манчестер Јунајтед е на последно место во Премиер-лигата, ако се сметаат мечевите откако на клупата е Рубен Аморим

Работата на Рубен Аморим во Манчестер јунајтед сè повеќе изгледа како неуспешен експеримент. Поразот од 0-3 во градското дерби против Сити не е само тежок удар за „црвените ѓаволи“, туку и нов доказ дека проектот со Португалецот е далеку од очекуваното.

Аморим го презеде тимот на 24 ноември 2024 година и оттогаш до денес има водено 31 натпревар во Премиер – лигата. Но бројките се немилосрдни – само 8 победи, негативна гол-разлика од -13 и вкупно 31 освоен бод. Ако се споредат сите 17 клуба кои во тој период настапуваат во елитата, Јунајтед е последен на табелата.

Дури и Тотенхем, кој е во криза и е честа мета на критики, има ист број бодови (31), но со значително подобра гол-разлика (-4). Пред нив се наоѓаат екипи кои ретко имаат амбиции за врвот, како Фулам, Вулверхемптон и Вест Хем.

На другата страна од табелата, Ливерпул ја оправдува својата титула од минатата сезона и е убедливо прв со 68 бодови, следен од Арсенал (64) и Челси (58).

Јасно е, Рубен Аморим и неговиот Јунајтед мораат брзо да најдат излез од кризата, или довербата во проектот ќе исчезне сосема.