Рубен Аморим не го криеше разочарувањето по поразот од 0-3 што Манчестер Јунајтед го претрпе во градското дерби со Манчестер Сити. Ова беше негов прв пораз во дербито откако минатата есен седна на клупата на „црвените ѓаволи“, а воедно и крај на четиримечната непобедлива серија на Јунајтед против „граѓаните“ во сите натпреварувања.
„Ова беше најголемата разлика. Најголемата разлика“, ја започна изјавата Аморим.
Ова е и второ дерби по ред во кое Јунајтед не успеа да постигне гол – пролетниот дуел заврши 0-0.
„Можевме да реагираме подобро, особено кај вториот гол. Примивме голови што можеа да се избегнат“, додаде Португалецот.
Тој нагласи дека Сити бил поефикасен и покрај тоа што имал помал посед на топката.
„Најголемата разлика беше тоа што кога ние имавме транзиции, не реализиравме. Во второто полувреме тие беа подобри во тие моменти и ние страдавме. Можеме многу подобро, тоа е јасно. Кај третиот гол недостасуваше квалитет во координацијата – играчите не знаеја кој да излезе на топката, а противникот остана слободен за погодок. При првиот гол тој беше меѓу четворица наши играчи и требаше да бидеме поагресивни“, анализираше Аморим.
Португалецот испрати и порака до навивачите:
„Ќе направам сè што можам за Манчестер Јунајтед. Страдам повеќе од нив. Нема да ја сменам мојата филозофија. Ако некој сака промена, тогаш ќе треба да го сменат човекот“, изјави стратегот.
