Последното коло од Втората фудбалска лига е закажано за в недела, со почеток од 17 часот, но многу побрзо ќе треба да биде донесена одлука за казните што, евентуално, ќе треба да ги добијат Кожуф и Башкими за „реализацијата“ на сомнителниот меч што го одиграа во Гевгелија. Башкими даде гол во 94.минута, длабоко од судиското продолжение за победа од 1-2.
Одбраната на домаќините делуваше „театарски“, а голманот буквално не реагираше, иако претходно, мора да се напомене, дека имаше одлични одбрани во текот на мечот.
Јасно е дека овој меч е крајно сомнителен, токму затоа е поведена и истрага од ФФМ, а Одделот за безбедност и интегритет покрена постапка пред Дисциплинската комисија поради основано сомнение за нарушување на интегритетот на натпреварот одигран на 6 мај 2025 година.
Седуммина од ФК Кожуф се веќе осомничени, против нив е поведена постапка од ФФМ, но исто така и полициска истрага.
Главното прашање сепак е…Кожуф не реши „за бадијала“ да прими гол во 94.минута, кога фудбалерите од одбраната и голманот буквално застанаа додека топката се тркалаше кон голот.
Треба да се најдат вистинските одговори… Кој се реши да даде „понуда што не се одбива“, и за колку илјади евра се работи….Според неофицијалните информации, 12.000 евра чинела „наредбата“ фудбалерите и голманот на Кожуф да застанат пред крајот на мечот.
Полициските органи ќе треба да го дадат одговорот, каде и како се понудени, но и преземени парите. Од друга страна, Дисциплинската комисија на ФФМ ќе мора многу брзо да објави и какви ќе бидат сакнциите, бодовни, но можеби и исфрлање во понизок ранг, доживотни или неколкугодишни суспензии за дел од актерите, но и наредбодавателите…
