Маркус Рашфорд би можел да го напушти Манчестер Јунајтед и да прејде во Барселона до крајот на зимскиот трансфер период. „Црвените ѓаволи“ наводно се незадоволни од неговите игри и однесување и сакаат да го продадат, додека Барселона покажува интерес за англискиот напаѓач. Сепак, постојат пречки за реализација на трансферот.
Според каталонскиот „Спорт“, Барселона прво мора да се ослободи од барем еден, а можеби и двајца играчи, за да направи место на платниот список за новото засилување. Како можни играчи за заминување се споменуваат Ансу Фати и Ерик Гарсија, но ниту еден од нив не е заинтересиран за напуштање на клубот, што претставува проблем за каталонците.
Дополнителен предизвик за Барселона е и интересот на Борусија Дортмунд, која исто така е заинтересирана за Рашфорд.
Рашфорд во својата кариера, која започна во 2015 година, го носел само дресот на Манчестер Јунајтед. Како офанзивен играч, најчесто користен на левото крило, тој има одиграно 426 натпревари за клубот, постигнувајќи 138 голови и 63 асистенции. Неговиот договор со Јунајтед важи до летото 2028 година.
Доколку Барселона успее да ги реши своите финансиски предизвици и да ослободи простор во тимот, трансферот на Рашфорд би можел да биде еден од најзначајните во зимскиот преоден рок.
