Тренерот на Феенорд, Бријан Приске, изрази загриженост дека лошата серија на Манчестер Сити може да им даде дополнителна мотивација на „граѓаните“ на вечерашниот натпревар од Лигата на шампионите меѓу двата тима. Сити влегува во дуелот на стадионот „Етихад“ со серија од пет последовни порази и ќе се обиде да ја прекине оваа негативна низа.
„Гледавме многу нивни натпревари и тие сè уште се многу добар тим“, изјави Приске на прес-конференција во Манчестер.
„Имаат одлични играчи и, според мене, тие сè уште се најдобриот тим во светот. Имаат висок квалитет на секоја позиција. Несомнено, ова е можеби најголемиот предизвик што го имале во последните неколку години поради резултатите, но мислам дека играа добро и покрај поразите. Знаеме дека треба да одиграме совршен натпревар. Мора да бидеме на врвот на нашите можности во секоја ситуација“, изјави Приске.
Феенорд, кој моментално е четврти во првенството на Холандија, има две победи од четирите натпревари во Лигата на шампионите, вклучувајќи ја и импресивната победа од 3-1 против Бенфика на гости.
Приске, кој го презеде тимот ова лето по заминувањето на Арне Слот во Ливерпул, додаде:
„Не очекувам да доминираме или да имаме повеќе посед на топката од Манчестер Сити, но дефинитивно ќе се обидеме да ги искористиме нашите шанси. Секако сакаме да играме фудбал. Кога играте во Лигата на шампионите, треба да одите и да играте со сите ваши квалитети. Ние не доаѓаме овде за да играме за нерешен резултат.“
