Добрите игри на тимот ја сместија Барселона на врвот на табелата во шпанското првенство, но тоа не значи дека клубот не се соочува со финансиски проблеми кои го отежнуваат животот на каталонскиот клуб. Најновата вест е дека неизвесно е како ќе изгледа составот во вториот дел од сезоната.
Шпанските медиуми пишуваат дека постои шанса Дани Олмо да не игра по првиот ден во јануари.
Во преговорите што ги води со својот значаен спонзор, Барселона очекува финансиски поттик преку претходно договорени бонуси. Сепак, сè е одложено за почетокот на следната година, а 60 милиони евра кои клубот ги очекува би можеле и да задоцнат. Ова претставува проблем не само за јануарскиот трансфер период, туку и за регистрирање на Дани Олмо и Пау Виктор за вториот дел од сезоната.
Олмо има договор до летото 2030 година. И двајцата играчи, како што пишува каталонскиот „Спорт“, се регистрирани само до 31 декември и се уверени дека клубот ќе најде решение за овој проблем.
Олмо пристигна во Барселона на почетокот на август во трансфер од Лајпциг и потпиша договор со каталонскиот клуб до летото 2030 година.
Лајпциг го продаде шпанскиот играч за 55 милиони евра, со бонуси во висина од седум милиони евра. Барселона во договорот вгради отштетна клаузула од 500 милиони евра. Во четири натпревари во Ла Лига за Барселона, Олмо постигна три гола.
