Фудбалерот на Манчестер Сити и на шпанската репрезентација, Родри (28), ја освои „Златната топка“ што ја доделува францускиот фудбалски магазин „Франс Фудбал“, заедно со УЕФА. Шпанскиот играч за врска доби најмногу гласови и заврши пред фаворизираниот Бразилец Винисиус Жуниор, кој не се појави на доделувањето.
Во Реал Мадрид се толку бесни што не сакаа да присуствуваат на церемонијата во Париз, а многумина во фудбалскиот свет сметаат дека Винисиус е неправедно оштетен.
Сепак, постојат три критериуми врз основа на кои се доделува „Златната топка“. Првиот се заснова на индивидуалниот учинок и тоа колку е карактерот на играчот решителен и импресивен.
На што падна Винисиус? Вториот критериум се тимските достигнувања и остварувања, а третиот, кој овојпат беше најважен, е господското однесување на теренот и фер-плеј играта. Винисиус често е критикуван за своето однесување кон противниците и противничката публика.
На социјалните мрежи се појави видео што прикажува некои од спорните потези на Винисиус, односно го покажува неговото однесување, кое на многу неутрални фанови им е иритантно.
