Фудбалската федерација на Саудиска Арабија повторно го назначи Французинот Ерве Ренар за селектор на националниот тим, заменувајќи го Роберто Манчини, соопштија официјално од азиската земја.
56-годишниот стручњак, кој го предводеше саудискиот тим од 2019 до 2023 година, ја презема функцијата од Италијанецот Манчини, кој си замина во четвртокот по взаемна согласност по 14 месеци на кормилото.
„Се вратив“, рече Ренар, облечен во традиционална локална облека, во видео објавено на профилот на саудиската репрезентација на социјалните мрежи.
„Неговиот договор е до крајот на 2025 година со опција за продолжување до Купот на Азија во 2027“, стои во соопштението.
Ренар ја напушти својата работа во Саудиска Арабија за да го предводи женскиот тим на Франција на Светското првенство и Олимпијадата во Париз во 2024 година.
„Не планирав да си заминам. Но кога татковината ти тропа на вратата, мораш да одговориш“, вели тој во видеото.
Во текот на својот прв период, Ерве Ренар ја одведе Саудиска Арабија до Светското првенство во Катар 2022, каде тимот неочекувано го победи идниот шампион Аргентина во својот прв натпревар.
Тој ќе започне со работа веднаш, бидејќи следните натпревари на тимот од квалификациите за Светското првенство против Австралија и Индонезија се во ноември.
Саудиска Арабија е на трето место во групата Ц по третото коло од квалификациите за Светското првенство во азиската зона со пет бодови. Тимот заостанува пет бодови зад лидерот на групата Јапонија по четири одиграни натпревари.
