Меѓународната фудбалска организација (ФИФА) го казни играчот на Комо, Марко Курто, со десет натпревари суспензија поради расистички навреди. Инцидентот се случил во средината на јули, за време на пријателски натпревар меѓу англискиот премиерлигаш Вулверхемптон и италијанскиот тим Комо, кога Курто вербално го навредувал јужнокорејскиот фудбалер Хванг Хи-Чан.
Комо сметаше дека инцидентот е „пренапумпан“, а портпаролот на клубот пренесе дека Курто, во разговор со соиграч, го нарекол Хванг „Џеки Чен“, славниот хонгконшки актер познат по своите акциони сцени. По натпреварот, Вулверхемптон поднел жалба до Европската фудбалска организација (УЕФА), но организацијата соопштила дека е немоќна да преземе било какви мерки бидејќи натпреварот не бил под нејзина надлежност.
Потоа, случајот бил пријавен до ФИФА од страна на Јужнокорејската фудбалска федерација.
ФИФА во своето соопштение наведе дека Марко Курто е прогласен за виновен и одговорен, па ќе биде казнет со десет натпревари суспензија поради расна дискриминација. Половина од казната е условна во период од две години, а на играчот му е наложено и да извршува општествено корисна работа, како и да посети едукативни програми.
По летните подготовки, Курто, како играч на Комо, беше позајмен во второлигашот Чезена.
