Нејмар сè уште не е подготвен да се врати на теренот по лекувањето на повредата, објави Жорже Жезус, тренерот на неговиот клуб Ал-Хилал.
Бразилската фудбалска ѕвезда потпиша договор со клубот од Ријад во август минатата година, но одигра само пет натпревари пред да ги скине предните вкрстени лигаменти на левото колено во октомври, по што беше подложен на операција.
32-годишниот напаѓач повторно започна со тренинзи во јули и се очекуваше наскоро да се врати на теренот, но неговото закрепнување се одолговлекува.
„Нејмар е важен играч за Ал-Хилал и за лигата во целина. Но во овој момент не можам точно да кажам кога ќе биде подготвен да се врати. Ќе ја разгледаме ситуацијата во јануари”, изјави Жезус, кој го водеше тимот до 19. титула во историјата на клубот во мај.
Нејмар сигурно нема да игра во лигата до крајот на годината, бидејќи не е регистриран. Тој ќе може да биде регистриран во тимот на почетокот на 2025 година за учество во вториот дел од сезоната во саудиската Про лига.
Ако Нејмар биде подготвен за игра порано, ќе може да настапи во натпреварите на азиската Лига на шампиони оваа есен, каде нема слични ограничувања.
