Македонскиот првак Струга Трим Лум го победи Пјуник со 2-1 во првиот дуел од второто квалификациско коло во Конференциската лига. Првиот гол од пенал беше дело на Бесарт Ибраими, а во 73.минута прекрасен гол од далечина постигна Стефан Спировски.
Играчот за врска стрелаше против тимот чиј дрес го носеше во сезоната 2022/23.
„Секако дека сме задоволни, можеби требаше подобро да го искористиме домашниот терен, но победата е победа, и еден гол разлика не е малку. Имаме уште 90 минути за игра, сигурно дека нема да биде лесно, знаеме за каква екипа станува збор. Колективно или индивидуално, верувам дека ги реализиравме задачите што ни ги даде тренерот, кој како што рече, можевме да оствариме и поубедлива победа, но и еден гол разлика е позитивен резултат пред реваншот“, изјави Стефан Спировски, кој ќе го памети мечот и по првиот постигнат гол во дресот на Струга Трим Лум.
