Француската суперѕвезда Килијан Мбапе денеска напладне ќе биде официјално претставен како фудбалер на Реал Мадрид на преполниот „Сантијаго Бернабеу“. Церемонијата ќе започне точно во 12 часот, најавуваат шпанските медиуми.
Се очекува на стадионот во шпанската престолнина да присуствуваат над 85.000 гледачи, со што Французинот ќе го сруши рекордот што Кристијано Роналдо го постави при своето претставување пред фановите на „кралевите“ пред 15 години.
Пред своето официјално претставување, Мбапе ќе потпише петгодишен договор со претседателот на Реал, Флорентино Перез, пред да влезе на стадионот напладне за да ги поздрави фановите, по што ќе одржи прес-конференција.
Иако новите негови соиграчи започнаа со тренинзи на 15 јули, напаѓачот, кој беше капитен на Франција за време на ЕВРО 2024, ќе има уште неколку дена одмор пред да ја започне сезоната во шпанската престолнина.
Клупските лекари ќе сакаат да го прегледаат неговиот нос, кој беше скршен за време на победата на Франција со 1-0 против Австрија на 18 јуни во групната фаза, иако подоцна Франција беше елиминирана во полуфиналето од Шпанија.
За Мбапе и Реал Мадрид, ова е кулминација на една долгоочекувана врска.
25-годишниот играч, кој вели дека отсекогаш бил фан на „кралскиот клуб“ и на Роналдо, ќе го носи дресот со број „9“, кој беше пуштен во продажба на 11 јули во продавниците на Реал, кои се покриени со неговиот лик.
Доаѓајќи од Пари Сен Жермен, на кој му се приклучи во 2017 година, Мбапе пристигнува по разочарувачки настап на Европското првенство, каде неговиот ѕвезден лик беше засенет од новата тинејџерска сензација на Шпанија, Ламин Јамал.
По тешката сезон во ПСЖ, тој реши да не го обновува својот договор. Напаѓачот, кој е најдобриот стрелец на парискиот клуб за сите времиња, призна дека се почувствувал „ослободен и олеснет“ од трансферот во Реал.
„Ова е огромно задоволство и остварување на сонот. Ова е клубот во кој отсекогаш сум сонувал да бидам“, рече тој во јуни.
„Одам таму со многу возбуда и со многу скромност“, додаде Мбапе.
Како актуелен освојувач на титулата во шпанската Ла Лига, Реал Мадрид ја започнува својата сезона со натпревар против Мајорка викендот на 17-18 август.
