Фудбалерите на Србија го завршија учеството на годинашното Европско првенство. Вечерва во Минхен одиграа 0-0 со Данска и го завршија натпреварувањето во групата Ц на последното место со два освоени бода.
Голманот на Србија, Предраг Рајковиќ, беше веројатно најсветлата точка во тим на Пикси на овој турнир, примајќи само два гола и бранејќи сè што можеше да одбрани. По испаѓањето не го криеше своето големо разочарување.
„Жал. Дефинитивно голем жал. Ова е една сјајна група момци, вредно работевме, верувавме, мислам дека заслуживме да продолжиме, но не ни се даде. Под силни емоции сум и тешко ми е да зборувам. Покажавме како се ‘гине’ за Србија. Жал ми е. Немам ништо од тоа што бев најдобар поединец на турнирот, подобро да примев пет гола, но да продолжевме понатаму. Жал ми е за навивачите. Сакам да им се заблагодарам за големата поддршка”, изјави голманот Предраг Рајковиќ.
