Селекторот на националниот тим на Словенија, Матјаж Кек, изјави дека „11 играчи нема да бидат доволни” кога ќе се соочат со агресивниот тим на Србија во нивниот втор натпревар од групната фаза на ЕВРО 2024. Тоа е првиот меч од денешната програма на Европското првенство.
„Знаеме дека 11 играчи нема да бидат доволни поради високото темпо и агресивноста на противникот. Работиме на тоа да одржуваме високо темпо низ сите 90 минути против противник како Србија,” изјави Матјаж Кек и додаде дека измените ќе бидат клучни за исходот на натпреварот.
Словенија ќе се обиде да напредува по ремито 1-1 со Данска, додека Србија го загуби првиот натпревар со 0-1 од Англија.
„Разговаравме за натпреварот со Данска. Знаеме дека второто полувреме беше многу подобро од првото, така што ќе се обидеме да го повториме тоа. Добивме одредени информации од нашиот стручен штаб и ќе се придржуваме кон нив,” рече дефанзивецот на Словенија, Петар Стојановиќ.
Тој додаде дека нема веќе проблеми со мускулните повреди и е на располагање за средбата. Стојановиќ го започна натпреварот против Данска, но беше заменет во 67-мата минута.
