Селекторот на германската фудбалска репрезентација Џулијан Нагелсман изјави денеска дека со резултатот од првиот натпревар, Унгарија е под малку поголем притисок од Германија пред меѓусебниот дуел на Европското првенство.
Германците во петокот на домашен терен во Минхен ја победија Шкотска со 5-1 во првиот натпревар на ЕВРО 2024, додека Унгарија во саботата во Келн загуби од Швајцарија со 3-1.
„Со резултатот од првиот натпревар, Унгарија е под малку поголем притисок од нас и ќе мора да игра поофанзивно отколку против Швајцарија, бидејќи поразот би можел да биде синоним за елиминација”, изјави Нагелсман.
Германскиот селектор рече дека неговиот тим добро ја анализирал играта на Унгарија.
„Унгарија е многу добар тим во транзициска игра, има двајца напаѓачи кои се навистина добри, но ние сме подготвени“, изјави 36-годишниот германски стратег.
Натпреварот Германија – Унгарија почнува во 18 часот.
