Тренерот на Фиорентина, Винченцо Италијано, тешко го поднесе поразот со 1-0 од Олимпијакос во финалето на Конференциската лига. Ова е втор последовен финален пораз за „виолетовите“ и вкупно трет во последните две години, ако се смета и поразот од Интер во финалето на Копа Италија минатата сезона.
Италијано призна дека овој пораз боли уште повеќе од претходните.
„По вторпат сме разочарани. Тажно е затоа што имавме многу шанси за гол, момците направија сѐ што можеа. Се бореа, создадоа шанси против тим кој не ти дозволува да играш добар фудбал. Голманот шутира само напред и топката воопшто не поминува низ средината. Мислам дека не заслуживме да го загубиме тој натпревар. Можевме барем да одиме на пенали. Огромно е разочарувањето бидејќи во третото финале играме добро, но сепак ни недостига искуство, лукавство и малку среќа за да стигнеме до победата. Извинете момци, но тоа е фудбалот. Мора да ги прифатиме овие порази. Ги познавам играчите и знам дека беа подготвени, мотивирани и фокусирани. Овие мечеви се решаваат според тоа со кого ќе се соочите, но секој го даде најдоброто од себе. Не одеше како што очекувавме, но имавме доволно шанси да постигнеме гол пред нив. Едноставно не ни оди во финалињата“, изјави Италијано.
Тренерот речиси сигурно ќе го напушти „Артемио Франки“ по завршувањето на сезоната. Тој призна дека е разочаран што си заминува без трофеј.
„Поразите болат. Да се оди до крај две години по ред е убаво, но целта е да го подигнеме трофејот, а ние не успеавме. Тажно е да ги гледам момчињата како плачат. Ќе разговарам со претседателот“, призна стратегот.
