Пред нас е 30. јубилејно финале на Купот на Македонија. Во него се среќаваат Македонија ЃП и Струга ТЛ, екипи кои покажаа најмногу во оваа сезона во ова натпреварување и затоа заслужено се најдоа во завршниот меч кој одлучува кој ќе го добие пехарот.
Македонија ЃП е бранител на Kупот, додека Струга Трим Лум за првпат вo својата историја ќе биде дел од ваков финален меч.
„Чест и задоволство е да се игра, да се биде учесник, да се биде тренер во едно големо куп финале за една земја. И двете екипи според она што го покажаа досега во ова натпреварување и тоа како заслужија. Кога ќе се пласираш во едно финале значи имаш квалитет, тука нема никакви дилеми. Струга Трим Лум стана шампион, тоа за нас е голема работа, го донесовме пехарот во градот Струга. Ова за нас беше историски момент. Сега ни се дава шанса да дојдеме до двојната круна и ќе се обидеме да ја искористиме оваа шанса. Очекувам добар меч, добро финале, секако очекувам триумф на нашиот тим, на Струга Трим Лум“, вели тренерот Шпетим Дуро.
Буњамин Шабани е еден од главните адути на Струга ТЛ оваа сезона. Тој очекува неизвесно финале, но и триумф на својот тим.
„Кога се игра еден ваков натпревар не ти треба дополнителна мотивација, значењето на самиот меч е доволно да те мотивира. Јас сум дел од најголемите успеси на Струга Трим Лум и затоа сум горд што пред некој ден станавме шампиони во првенството, сега на ред е двојната круна. Тимот од Ѓорче заслужува голем респект. Во првенството одигравме три меча и сите завршија без победник, веројатно тоа гарантира едно неизвесно финале. Сепак, ние сме шампиони и секако дека посакувам уште еден трофеј“, истакна Шабани.
Финалниот натпревар е закажан за 17 часот, на комплексот на ФФМ.
