Продолжувајќи во истиот стил од есенскиот дел Вардар ја почна и пролетната сезона во Првата македонска фудбалска лига, со убедлива победа од 3-1 против Македонија ЃП.
„Црвено-црните“, на тој начин, им се реваншираа на „лавовите“ за првиот пораз сезонава во 1. коло од шампионатот. „Вардарци“ по квалитетниот почеток на дуелот на арената „Тодор Проевски“, победата ја најавија со голот на Реис Жуниор во 37. минута, кој одлично ја искористи асистенцијата на Цветановски.
Во второто полувреме, во 49. минута веќе беше 2-0 за Вардар откако 19-годишниот Џемал Ибиши одлично ја искористи грешката на гостите во својот шеснаесетник.
Иако во продолжението фудбалерите на Наџи Шенсои поактивно тргнаа во желбата за гол во мрежата на Гачевски, сепак следеше погодок повторно во мрежата на гостите. Во 59. минута и Цветановски постигна убав гол за 3-0.
Почесниот гол за Македонија ЃП беше дело на Паду во 67. минута од средбата.
ПМФЛ – 19. КОЛО
Скопје: ВАРДАР – МАКЕДОНИЈА ЃП 3-1 (1-0)
УТРЕ (14 ч.)
Скопје: ШКУПИ – БОРЕЦ
Струга: СТРУГА ТЛ – РАБОТНИЧКИ
Тетово: РЕНОВА – СИЛЕКС
Струмица: АК. ПАНДЕВ – ШКЕНДИЈА (13 ч.)
