Последниве години сведочевме на бројни случаи на местење натпревари, но сега вниманието е насочено кон судиите и нивните технички асистенти. Ако некој мислеше дека со ВАР ќе се репи проблемот, од Бугарија доаѓа најновиот скандал.
На натпреварот меѓу ЦСКА и Локомотив Софија (1-0), камерата ненамерно открила загрижувачки момент – еден од техничките оператори во ВАР собата бил снимен како на својот мобилен телефон проверува страници за обложување.
Вообичаено, пред стартот на натпреварите во многу европски лиги, ТВ-преносот прикажува кадри од ВАР просторијата. Така беше и овојпат, но гледачите во Бугарија останаа шокирани кога забележаа дека операторот, кој им помага на судиите при изборот на снимки, се занимава со нешто сосема друго – прегледување на апликација за обложување.
ВАР судијата Волен Чинков и неговиот асистент Стојан Арсов биле фокусирани на мониторите, додека операторот, кој се наоѓал до нив, не изгледал свесен дека е снимен. Кога сфатил дека камерата го прикажува, се забележало неговото изненадување.
Овој инцидент предизвика бура реакции на социјалните мрежи, а многумина бараат истрага од фудбалските власти во Бугарија. Иако не е потврдено дали операторот навистина се обложувал на самиот натпревар, самата можност за такво нешто отвора сериозни сомнежи за интегритетот на ВАР системот и објективноста на судиските одлуки.
Останува да се види дали официјалните институции ќе реагираат и дали овој случај ќе добие епилог кој ќе спречи слични инциденти во иднина.
