Генералниот секретар на Европската фудбалска федерација, Теодорос Теодоридис, изјави дека УЕФА може да ги отстрани Реал Мадрид, Барселона и Јувентус од Лигата на шампионите бидејќи клубовите се основачи на Суперлигата и досега не се повлекоа.
„Можно е. Ако клубовите не ги почитуваат правилата, тие можат да бидат исфрлени. Сè зависи од нив. Сите други клубови ги следеа правилата. Ова нема да биде лична одлука на претседателот на УЕФА или на Извршниот комитет на организацијата. Имаме јасна поделба на силите, Извршниот комитет и раководните луѓе на УЕФА не можат да влијаат врз работата на етичката комисија.
Овие три клуба се едни од најдобрите во светот. Сепак, за УЕФА, сите клубови се еднакви и ние браниме вредности како што се почит и еднаквост. Доколку клубовите ги прекршат правилата, тогаш тие мора да се соочат со последиците што треба да ги утврдат независни тела. Доколку клубовите не се согласуваат со одлуката на независните дисциплински органи, тие можат да поднесат жалба до Арбитражниот суд за спорт (ЦАС)“, изјави Теодоридис.
Во април, 12 врвни европски клуба – Манчестер Јунајтед, Ливерпул, Манчестер Сити, Арсенал, Челси, Тотенхем, Барселона, Реал Мадрид, Атлетико Мадрид, Интер, Милан и Јувентус најавија создавање на Суперлигата. За неколку дена сите клубови освен Реал Мадрид, Барселона и Јувентус најавија повлекување од натпреварувањето.
На 25 мај, УЕФА отвори дисциплинска постапка против овие клубови, беше објавено дека на трите екипи кои не се повлекоа од Суперлигата може да им биде забрането учество во европските натпреварувања.
