Работнички и Вардар по две и пол години повторно се среќаваат во градска прволигашка пресметка. Во денешното 11.коло од Првата фудбалска лига, на стадионот „Борис Трајковски“ во Маџари, Работнички е фаворит против „црвено-црните“, со оглед на позициите на табелата и моментните случувања, но тоа сепак и не мора премногу да значи за денешниот резултат.
Дуелот од страна на „романтичарите“ го најави младинскиот репрезентативец Димитар Тодоровски. Тој и соиграчите ќе се обидат да стигнат до триумф против „црвено-црните“.
„Вардар е најтрофејниот македонски клуб и секогаш ќе имаме максимален респект за овој ривал. Градското дерби секогаш нуди голема борба и допадлив фудбал, така сигурно ќе биде и на утрешната пресметка. Ние сме максимално мотивирани и посакуваме победа. Ќе треба и да се потрудиме да ја оствариме на теренот“, изјави Димитар Тодоровски за официјалниот сајт на клубот.
Вардар е на дното на табелата, а најголемата сила во моментот ја црпи од „Комитите“ кои и денеска најавија дека во голем број ќе пристигнат да го бодрат својот тим.
Лидерот Шкендија во Тетово ја пречекува Брера, а Шкупи во Куманово ќе биде домаќин на Брегалница.
Шампионот Струга Трим Лум доаѓа на мегдан во Ѓорче Петров и ќе игра против Македонија ЃП.
Интересна ќе биде и пресметката меѓу Гостивар и Воска, а Силекс во Кратово ќе се сретне против Тиквеш.
ДВОЈКИ ПРВА ЛИГА, (денеска, 14 часот)
РАБОТНИЧКИ – ВАРДАР
ШКЕНДИЈА – БРЕРА
ШКУПИ – БРЕГАЛНИЦА
СИЛЕКС – ТИКВЕШ
МАКЕДОНИЈА ЃП – СТРУГА ТЛ
ГОСТИВАР – ВОСКА
