Манчестер Јунајтед ќе се сретне со Манчестер Сити во финалето на ФА Купот, откако во полуфиналната фаза го победи Брајтон на пенали. „Граѓаните“ сѐ уште можат да ја освојат тројната круна оваа сезона, подвиг што го постигнале само „црвените ѓаволи“ во англискиот фудбал.
Тен Хаг знае дека неговите играчи имаат шанса да ги уништат соништата на своите ривали победувајќи ги во финалето на ФА Купот на „Вембли“.
„Разбирам како навивачите на Манчестер Јунајтед се чувствуваат за тоа. Ќе направиме сѐ за да не им дадеме причина за такво славење. Ќе дадеме повеќе од 100 проценти во финалето, пред сѐ за да го освоиме трофејот. Навивачите можат да сметаат на тоа“, изјави Ерик тен Хаг.
Манчестер Јунајтед веќе освои трофеј на „Вембли“ оваа сезона, совладувајќи го Њукасл со 2-0 и триумфираше во Карабао купот. Тимот на Тен Хаг, исто така, го победи Манчестер Сити со 2-1 во Премиер – лигата во јануари, но „црвените ѓаволи“ исто така беа поразени со 3-6 на „Итихад“ во октомври.
