Македонскиот првак Шкупи вечерва (21 часот) го игра најважниот натпревар во поновата клупска историја. Ќе се обиде да го скине скалпот на хрватскиот и балкански гигант Динамо Загреб и да се пласира во третата рунда од квалификациите за Лигата на шампионите. Тоа автоматски значи и обезбеден пласман во групна фаза од Лига Европа доколку не може дотурка подалеку во Лигата на шампионите. Тоа значи и испишување на нова блескава историја, но и повторување на најголемиот успех на еден македонски клуб во европски рамки, што досега го остварил само Вардар.
„Подготвени сме за надигрување, но и не „летаме“, затоа што многу добро знам против каков ривал ќе играме. Динамо е голем клуб, има одлични фудбалери, искусни во европските натпреварувања. Тие се фаворити и понатаму, нема сомнеж за тоа, иако одигравме 2-2 на „Максимир“ и денешниот реванш ќе го играме пред околу 20.000 наши фанови. Верувам дека ќе го дадеме максимумот, а за да направиме сензација мислам дека треба да се надминеме себеси и да одиграме за уште 40% подобро од првиот меч во Загреб. Но, ги гледав момците изминатите денови, како работат и колку ова многу им значи, и тоа ми влева дополнителна верба“, вели тренерот на Шкупи, Гоце Седлоски.
Динамо Загреб доаѓа да победи, и тоа јасно го напомена тренерот Анте Чачиќ. Аријан Адеми ќе има повторно клучна улога во средниот ред, а Стефан Ристовски овојпат ќе биде стартер и ќе игра како стопер, со оглед дека „модрите“ имаат проблеми со повредени фудбалери во дефанзивата.
Гоце Седлоски нема да може да смета на повредениот офанзивец Данфа.
Натпреварот е закажан за 21 часот, на арената „Тодор Проески“ во Скопје.
