Рома веднаш го избра наследникот на отпуштениот тренер Даниеле Де Роси. Нов тренер на тимот ќе биде Иван Јуриќ. Договорот меѓу двете страни е само до следното лето, но автоматски ќе биде продолжен за уште една година ако Рома успее да се квалификува за Лигата на шампионите, што не им се случило во последните шест години.
Според информациите, Јуриќ веднаш ќе почне со работа на чело на „волчивата“ и ќе ја води денешната тренинг сесија. 49-годишниот стручњак ќе дебитира како тренер на тимот на неделниот натпревар на домашен терен против лидерот во Серија А, Удинезе.
Хрватскиот стручњак има значително искуство во Италија благодарение на периодите на чело на Џенова, Верона и Торино, од каде што замина по завршувањето на минатата сезона.
Затоа, тој е избран пред Един Терзиќ и Томас Тухел, кои исто така беа во опција, со оглед дека се слободни во моментот.
