Реал Мадрид слави во „Ел Класико“: Алаба и Васкез донесоа „кралски“ триумф (ВИДЕО)

Реал Мадрид успеа да слави против Барселона (1-2) во големото дерби „Ел Класико“ освојувајќи го „Камп Ноу“ кој вечерва беше исполнет со максималниот капацитет. На стадионот имаше 86.422 гледачи, а најголемиот дел од нив останаа разочарани затоа што се симпатизери на Барселона. Давид Алаба и Лукас Васкез беа стрелци за „кралевите“, а Серхио Агуеро во последните мигови стрелаше за Барселона.

Давид Алаба го постигна првиот гол во дресот на Реал Мадрид по доаѓањето од Баерн Минхен и не можеше да избере поубав момент. Во 32.минута го совлада Марк Андре Тер Штеген со силен и прецизен удар откосо од левата страна.

Роналд Куман го доживеа третиот последовен пораз на „Ел Класико“ и го израмни неславниот рекорд стар 85 години, а Карло Анчелоти го врати Реал Мадрид на победнички патеки откако немаше триумф на последните два меча во Ла Лига.

„Кралевите“ одиграа тактички совршен меч, а Барселона може да жали за колосалната шанса на Сержињо Дест непосредно пред погодокот на Алаба.

Во завршницата, Барса со сите сили тргна во напад, а тоа ривалот го искористи за противнапад и втор гол. Мрежата на Тер Штеген ја погоди Лукас Васкез во 94.минута. Каталонскиот тим постигна почесен погодок преку Серхио Агуеро во седмата минута од судиското продолжение.