Работнички и Силекс денеска (14 часот) на Националната арена „Тодор Проески“ го отвораат 20.коло во Првата фудбалска лига. „Романтичарите“ паузираа две седмици откако ја совладаа Академија Пандев во Струмица со 0-1, па сакаат повторно да фатат победнички ритам.
Капитенот Горан Силјановски вели дека овој дуел е многу важен за тимот.
„Дуелот со Силекс е екстремно важен за Работнички. По успешниот старт и триумфот над Академија Пандев, сакаме да продолжиме во ист стил и против Силекс, на домашната пролетна премиера. Подготвени сме за предизвикот, максимално мотивирани и се надеваме дека ќе успееме да ги освоиме трите бода. Силекс заслужува респект, имаат квалитетен состав, но ние веруваме во нашите можности и посакуваме триумф“, вели капитенот на Работнички, Горан Силјановски.
Силекс бара рехабилитација по поразот од лидерот Шкендија (1-2) во Кратово во првото пролетно коло. Тренерот Горан Симов верува дека неговиот тим ќе успее да остане непоразен во Скопје.
На останатите натпревари, утре се среќаваат: Шкендија – Вардар, Пелистер – Ренова, Беласица – Струга Трим Лум, Македонија ЃП – Борец, Шкупи – Академија Пандев.
