Менаџерот на Тотенхем, Анге Постекоглу, искажа разбирање кон Рубен Аморим по победата од 1-0 над Манчестер Јунајтед, знаејќи колку е тешко да се носиш со проблемите со повреди. Португалецот имаше сериозни потешкотии во составувањето на тимот, но Постекоглу потсети дека Тотенхем веќе два месеци е во слична ситуација.
„Свесен сум дека Рубен се соочи со тешкотии поради повредените играчи и мораше да прави измени во тимот, додека на клупата имаше многу млади фудбалери. Но, тоа е реалност со која јас живеам веќе подолго време. Тој мора да се справи со ова на еден натпревар, но замислете како е да го правите истото цели два месеци“, изјави Постекоглу.
Австралиецот верува дека слични предизвици ќе ги погодат и другите тимови во наредните месеци.
„Не сме единствени со вакви проблеми. Веќе одамна кажав дека ова ќе се случува. Наскоро ќе видите дека и други клубови ќе минуваат низ исти потешкотии, па можеби тогаш ќе сфатат колку е комплицирано да се одржи континуитет во играта“, додаде тој.
Како пример, Постекоглу ги посочи Манчестер Сити, кој се мачи без Родри, и Арсенал, кој има проблеми без Букајо Сака, нагласувајќи дека отсуството на клучни играчи секогаш остава последици врз тимот.
