Репрезентацијата на Србија одигра нерешено 3-3 против Камерун во второто коло од групната фаза на Мундијалот, иако на почетокот на вториот дел водеше со 3-1.
На многумина не им беше јасно зошто селекторот Стојковиќ не направи некои други потези со измени во вториот дел од играта, но и како Србија дојде во позиција да прими голови од противнапади кога имаше водство.
„Најинтересниот натпревар за гледање, а како е за нас тренерите, знаеме само ние. Се чувствувам фрустрирано, бидејќи по водството на Камерун го најдовме нашиот начин на игра, имавме голема предност и треба да бидете паметни за да ја сведете играта така како што сакате. Повторно скапо не чинеа некои грешки, тој втор и трет гол на Камерун, апсолутно непотребно одење напред од последната линија, обид да се направат некои офсајди, што е забрането во врвниот фудбал. Можевме да победиме, за нијанса сме подобри од Камерун, но резултатот вели дека е 3-3, одиме понатаму“, изјави селекторот на Србија, Драган Стојковиќ Пикси.
Слично размислува и капитенот на Србија, Душан Тадиќ.
„Буквално, ролеркостер, имаме се под контрола и ни се случуваат два удари. Неверојатно. Но, мора да бидеме позитивни. Имаше и добри работи, се надевам дека Бразил ќе победи и дека ќе покажеме карактер кога е најтешко, како што правевме досега. Офанзивната игра радува, можевме да постигнеме повеќе голови, дека ќе влезе кога ќе биде најпотребно. Не знам што да кажам, можеби ни треба подобра комуникација меѓу играчите, да разговараме и да знаеме што точно се случува. Тоа го очекувам од секој од нас“, изјави Тадиќ.
Селекторот Стојковиќ потоа се надоврза со коментар за пропуштените прилики.
„Успеавме да создадеме колосални шанси, Митровиќ имаше една статива и не знам како таа шанса успеа да се пропушти. Имаше добри напади и тоа ме радува, ние сме тим кој може да создава шанси. Тоа ме радува, но тоа што примивме три гола, тоа мора да го анализираме, како да го решиме во иднина. Имавме принудни замени, Павловиќ и Вељковиќ, тоа не е алиби, но се чувствувам виновен што морам да менувам играчи поради повреди“, изјави Стојковиќ.
