Тренерот на Рома, Жозе Мурињо, не е сигурен дали Пауло Дибала ќе може да игра на неделниот натпревар од Серија А против Торино. Аргентинскиот напаѓач се опоравува од повредата на бутниот мускул која му го загрози учеството на Светското првенство.
Дибала ја заработи повредата во победата од 2-1 на домашен терен против Лече минатиот месец и Португалецот тогаш изјави дека можеби ќе му биде тешко да се врати на терените пред 2023 година.
Селекторот на Аргентина, Лионел Скалони се надева дека 28-годишниот фудбалер се уште има време да се опорави пред Светското првенство во Катар.
„Не знам какви се контактите на Дибала со Аргентина и со Скалони. Не знам дали треба да игра в недела за да оди на СП или да не игра и сепак ќе оди на Светско првенство“, изјави Мурињо.
Домашните лиги ќе бидат прекинати по натпреварите на Светското првенство овој викенд од 20 ноември до 18 декември.
„Едно е јасно. Фудбалерите кои се повикани на Мундијалот повеќе ќе размислуваат за Мундијалот отколку за овие последни натпревари на нивните клупски тимови“, додаде Мурињо. „Секако дека ни треба Пауло. Ако имам избор, би сакал да го имам Дибала против Торино“.
Аргентина, која ќе го објави својот состав од 26 играчи в понеделник, ќе ја започне својата кампања на Светското првенство на 22 ноември против Саудиска Арабија. Тие исто така се соочуваат со Мексико и со Полска во групата Ц.
