Лионел Меси нема да го продолжи договорот со ПСЖ, барем како што во моментот стојат работите при преговорите меѓу Аргентинецот и францускиот првак. Во тимот владее хаотична атмосфера, а и резултатите не се според очекувањата, па критики трпи и Меси.
Францускиот весник „Л’Екип“ објави дека таткото на Лионел Меси, Хорхе, кој е и негов агент, ја одбил најновата понуда на парискиот клуб за потпишување нов договор и синоќа одлетал за Барселона, но не сакал да ја коментира за новинарите иднината на светскиот шампион.
Меси по сѐ изгледа дека размислува за заминување во МЛС – лигата на САД, но не би ја затворил вратата за хипотетичко враќање во Барселона. Тој сериозно размислува да ја напушти француската лига за да се впушти во нова професионална авантура.
Лео Меси нема да прифати едногодишно продолжување на договорот бидејќи ПСЖ сакаше да наметне намалување на неговата плата за да избегне проблеми со финансискиот фер-плеј.
Клубот од Париз, според „Л’Екип“, инсистира дека ова се нормални преговори за да се справи со обновувањето и дека ништо не е конечно. Двете страни ќе продолжат со разговорите за да се обидат да постигнат договор.
