Капитенот на Лајпциг, Петер Гулаши, зборуваше пред дуелот со Реал Мадрид во осминафиналето од Лигата на шампионите. Унгарскиот голман се воодушевува на квалитетите на „кралскиот клуб“, но истакна дека тимот од Источна Германија ќе биде оптимално подготвен за дуелите со најтрофејниот европски клуб.
„Многу добро знаеме за индивидуалните квалитети на играчите на Реал. Винисиус играше во одлична форма во последните недели и беше вклучен во нивните последни три гола. Дел од него е и Родриго. Можеме да зборуваме и за нивниот среден ред, иако Џуд Белингам сега е повреден“, изјави капитенот на Лајпциг.
„Реал е исклучително силен тим со голема офанзивна моќ. И тие се во добар ритам и не треба да се подготвуваме за еден фудбалер, туку за сите заедно, како тим“.
„Многу сум среќен што можам да бидам на теренот во нокаут фазата од Лигата на шампионите. Ова е нешто многу посебно за секој фудбалер. Се обидувам да му помогнам на тимот со моето искуство. Така ќе биде и против Реал Мадрид и ќе дадам сѐ од себе да се покажам на добро ниво“, истакна унгарскиот голман.
Гулаши потсети и на успехот против Реал Мадрид во октомври 2022 година со 3-2.
„Ако го направивме тоа неодамна, можеме повторно“, истакна тој на прес – конференцијата пред дуелот со „кралскиот клуб“.
Лајпциг, чиј член е македонскиот репрезентативец Елиф Елмас, го пречекува Реал Мадрид утревечер во првиот осминафинален натпревар од Лигата на шампионите.
